Makthi i italianëve, arratiset për të katërtën herë nga burgu shqiptari

Një i dënuar shqiptar është arratisur nga burgu i sigurisë së lartë në Opera të Milanos, në një episod që mediat italiane e kanë përshkruar si arratisje “në stil Hollivudi”. I burgosuri, 41-vjeçari Taulant Toma, i cili duhej të vuante dënimin deri në vitin 2048, ka përdorur çarçafë të lidhur për të zbritur nga dritarja e qelisë.

Arratisja u konfirmua nga zyrtari i Administratës Italiane për Ekzekutimin e Sanksioneve Penale, Giannarino De Fazio. “Ai lidhi çarçafët me njëri-tjetrin në hekurat e dritares dhe kështu zbriti nga qelia”, deklaroi De Fazio për agjencinë e lajmeve ANSA.

Ende nuk dihet nëse i burgosuri ka pasur ndihmë nga jashtë apo si arriti të kalonte murin perimetral të burgut, por autoritetet kanë nisur menjëherë kërkimet për gjetjen e tij.

De Fazio u shpreh se rasti tregon qartë mangësitë strukturore të sistemit penal italian. Sipas tij, arratisja “nxjerr në pah dështimet e politikave të institucioneve penale gjatë 25 viteve të fundit”, duke nënvizuar edhe problemin e mbipopullimit në burgjet italiane.

Ai bëri të ditur se në burgun e Operas ndodhen 1,338 të dënuar, ndërsa kapaciteti i objektit është vetëm 918 vetë.

Ndërkohë, sipas ANSA-s, kjo është arratisja e katërt e Taulant Tomës nga një institucion penitenciar. Rasti i fundit është regjistruar në vitin 2013, kur ai u arratis nga burgu i Parmës së bashku me një të dënuar tjetër.

Autoritetet italiane vijojnë kërkimet intensive pasi shqiptari konsiderohet shumë i rrezikshëm.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)