“Jam i pafajshëm, më lironi”, babai që plagosi vajzën në Durrës mohon krimin

Gjykata e Durrësit ka vendosur të lerë në burg 56 vjeçarin Mikel Ndoj, i cili dy ditë më parë plagosi me thimë vajzën e tij 24 vjeçare dhe një koleg që kishte ndërhyrë për ta mbrojtur.

Përpara trupit gjykues, Ndoj mohoi ta ketë kryer këtë krim duke thënë se është i pafajshëm dhe se duhet të lirohet menjëherë pasi thikën nuk e kishte ai dhe as nuk ishte shkaktar i krimit.

Por provat e mbledhura nga grupi hetimor dhe kamerat nga vendngjarja japin një dëshmi tjetër dhe për këtë arsye gjykata vendosi ta lerë në burg 56 vjeçarin dhe ta cilësojë të ligjshëm arrestimin.

Mikel Ndoj jetonte në Itali dhe ishte kthyer për të kërkuar ribashkim me familjen e tij dhe gruan me të cilën ishte divorcuar, pikërisht për dhunë në familje.

Kur ka hasur në rezistencën e vajzës për t’u afruar ai e ka goditur atë me thikë, dhe më pas sulmoi dhe kolegun e saj, i cili u fut në mes për të shmangur një përshkallëzim të situatës.

Të plagosurit u dërguan në spital me plagë jovdekjeprurëse, teksa autori u arrestua disa orë më pas pasi u largua nga vendngjarja.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)