Berisha: Minimumi jetik mbi 200 euro, emigracion pa transparencë dhe akuza për afera miliarda euro

Nga mbledhja e Grupit Parlamentar të Partisë Demokratike, kryetari i PD-së, Sali Berisha, prezantoi qëndrimet kryesore të opozitës lidhur me Buxhetin 2026 dhe çështje të tjera që, sipas tij, prekin drejtpërdrejt qytetarët.

Në fjalën e tij, ai theksoi se PD do të riparaqesë në Kuvend amendamentin për minimumin jetik, që duhet të jetë mbi 200 euro. Berisha e cilësoi Buxhetin 2026 si “një piramidë mashtrimi dhe vjedhjeje”, duke argumentuar se rritja e çmimeve dhe kostos së jetesës po rëndon mbi familjet shqiptare dhe po shoqërohet me taksa më të larta.

“Sipas Eurostat, rritja e çmimeve krahasuar me vendet e tjera është 1% më e lartë se çmimi mesatar i BE-së, në ushqime është 17%. Ka një studim me të dhëna të frikshme nga një ekspert absolutisht i pavarur, i cili nxjerr çmimet në Shqipëri, 85% më të larta se në mesataren e BE-së. Do të paraqesim në Kuvend amendamentin për minimumin jetik. Me këtë rritje çmimesh është e domosdoshme që minimumi jetik të jetë mbi 200 euro”, tha kreu i PD-së.

Në vijim, u ndal te çështja e emigracionit, duke deklaruar se për 28 qendrat e emigrantëve në vend nuk ka pasur asnjë transparencë ndaj qytetarëve shqiptarë. Sipas Berishës, mënyra se si po menaxhohen këto qendra krijon rrezikun që emigrantët të përfundojnë “në kthetrat e mafias”.

“Nëse nuk bëhen hapat e parë të mbështetur financiarisht popullsinë, po ecim drejt një humnere kombëtare. Edhe nëse fillohet këtë vit, do të duhen 30 deri në 50 vjet për të arritur atje ku ishim në vitin 2013. Po bëhet një projekt shfarosës, shpërbërës, që kërkon me çdo kusht që njerëzit të ikin nga Shqipëria. Flasin për hapjen e 28 qendrave të reja të pritjes së emigrantëve. Nuk është bërë asnjë transparencë për këto, por ajo që dua të them është se Shqipëria po shndërrohet në autostradë emigrantësh. Është një barbari mbi emigracionin në radhë të parë. Së dyti, me këtë Edi Rama synon të zëvendësoje shqiptarët që ikin, të denatyrojë kombin shqiptar në një mënyrë të paimagjinueshme. Ky është rrezik ekzistencial për Shqipërinë”, shtoi kreu i opozitës.

Berisha hodhi akuza të forta ndaj Belinda Balluku për aferat korruptive. Ai deklaroi se, si ministre, ajo ka administruar rreth 12 miliardë euro fonde publike në infrastrukturë, ku “përllogaritet se 90% e tyre janë zhdukur”. Sipas Berishës, Balluku dhe kryeministri Edi Rama janë të përfshirë në aferën e tunelit të Llogarasë, ndërsa mesazhet e shkëmbyera në këtë çështje, sipas tij, lidhen më shumë me kryeministrin. Kreu i opozitës njoftoi për dialog intensiv me shqiptarët dhe paralajmëroi protestat më të fuqishme që ka parë vendi.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)