“Trimoshat e BKH nuk dorëzuan patllaken në Kryeministri”, Rama: Të ndajmë beben e lindur nga ujërat e pista

Drejtësia e re ishte në fokus të podcastit të kryeministrit Edi Rama të kësaj të diele.

Pasi komentoi vendimin e GJKKO për zv/kryeministren Balluku, kreu i qeverisë reagoi edhe për kërkesën e gjykatësve për rritjen e pagave.

Sipas Ramës, disa protagonistëve të kësaj drejtësie të re iu duket vetja sikur janë ligji dhe shteti dhe me forcë duan të hapin arkat e shtetit.

Ai solli në vëmendje kur disa hetues të BKH kishin vizituar Kryeministrinë dhe refuzonin të dorëzonin pistoletën që iu është dhënë me leje te hyrja, sipas protokollit të Gardës.

“Dy indicie tejet shqetësuese nuk provojnë se protagonistëve të pavarësisë së drejtësisë u ka marrë koka erë dhe u është mbushur mendja se ata janë shteti, ligji e drejtësia, si puna e ca trimoshave të BKH-së, për të cilët kam dëgjuar shumë çudira, po kishin ardhur një ditë në godinën e Këshillit të Ministrave, e nuk donin ta linin patllaken tek dera sipas rregullores së sigurisë së lartë, të Gardës së Republikës.

Pra, nuk dua kurrsesi të them se ferrat e mendësive e sëmundjeve të vjetra, e kanë marrë uratën e drejtësisë së re, por dua të ndaj me të gjithë  bindjen se ka ardhur koha e një reflektimi serioz, profesional dhe ndërinstitucional, për të ndarë beben e sapolindur nga ujërat e pistë, në një proces historik, ku duhet të garantojmë medoemos suksesin e Reformës në Drejtësi, duhet të garantojmë  pavarësinë e gjyqësorit, po ku po ashtu, nuk mundet kurrsesi të lejojmë medoemos që kura të bëhet problem më i madh se sëmundja, duke rrezikuar liritë, të drejtat dhe frymëmarrjen e administratës e të ekonomisë së vendit”, tha Rama.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)