Salianji mungon, Alimehmeti në rreshtin e fundit, PD mbledh Këshillin Kombëtar

Këshilli Kombëtar i Partisë Demokratike është mbledhur këtë të mërkurë për herë të parë pas humbjes në zgjedhjet parlamentare të 11 majit. Në fokus të mbledhjes janë diskutimet mbi situatën politike në vend, çështja e Belinda Ballukut për të cilën SPAK ka kërkuar heqje imuniteti si dhe protesta kombëtare e paralajmëruar për datën 22 dhjetor.

Gjatë fjalës së tij para anëtarëve të Këshillit Kombëtar, kryetari i PD-së, Sali Berisha, përsëriti qëndrimin se zgjedhjet e 11 majit ishin një farsë elektorale, duke akuzuar kryeministrin Edi Rama për vjedhje të votës me mbështetjen e bandave kriminale dhe përdorimin e shtetit në funksion të fushatës.

Berisha deklaroi se opozita nuk kishte mundësi të ndalonte veprimet e qeverisë gjatë fushatës, të cilat sipas tij përfshinin shpërndarje parash për pensionistët, legalizime, certifikata pronësie, leje ndërtimi dhe aktivitete të tjera të paligjshme. Ai theksoi se këto veprime e kanë deformuar rëndë procesin zgjedhor.

“Ne jemi opozitë dhe nuk mund ta ndalonim këtë farsë. Këto ishin përmasa të papara më parë. Kam deklaruar se me Ramën nuk ka zgjedhje dhe ai e faktoi këtë edhe në vitin 2021, kur shpërndau 130 milionë euro, duke i kthyer zgjedhjet në farsë në një vend të varfër”, u shpreh Berisha.

Kreu i PD-së nënvizoi se detyra e opozitës ishte dokumentimi i shkeljeve dhe denoncimi i tyre si brenda vendit ashtu edhe përballë ndërkombëtarëve. Sipas tij, raporti i OSBE/ODIHR ka konfirmuar një pjesë të konsiderueshme të akuzave të opozitës për manipulim zgjedhor dhe përdorim të paligjshëm të pushtetit.

Ndërkohë, ish-deputeti Ervin Salianji mungon në mbledhje, pasi po zhvillon takime me strukturat e PD-së në bazë. Paraditen e së mërkurës, Berisha paralajmëroi përjashtimin e tij, duke e akuzuar se është takuar me Suel Çelën dhe se ka ushtruar presion mbi demokratët e një dege për të marrë pjesë në një takim të tij në Teatrin “Skampa”.

Në mbledhje janë të pranishëm edhe zëra kritikë brenda Partisë Demokratike, përfshirë Ilir Alimehmetin dhe Mylsim Murrizin, të cilët janë ulur në rreshtat e fundit të sallës.

Në përfundim, Berisha deklaroi se, sipas tij, e vetmja rrugë për garantimin e zgjedhjeve të lira dhe të ndershme në Shqipëri është largimi i Edi Ramës nga pushteti.

17:59 -  “Është ora jonë, të rrëzojmë kalbësirën”, Berisha: Rama duhet të japë llogari

Foto: LSA

Në mbledhjen e parë të Këshillit Kombëtar të Partisë Demokratike, që pas zgjedhjeve të 11 majit, Sali Berisha tha se tashmë ka ardhur koha që opozita të rrëzojë këtë qeveri të përfshirë në skandale.

Në lidhje me deklaratën e fundit të kryeministrit Rama pas vendimit të SPAK për zv.kryeministren Balluku, Berisha i bëri thirrje kreut të qeverisë që të mos guxojë të ushtrojë presion dhe të përpiqet të kontrollojë drejtësinë.

“Kjo diktaturë përdor institucionet për të shtypur pluralizimin. Por ne qëndruam dhe qëndruam fuqishëm. Për shkak të situatës emergjente një axhendë e shtyjmë për një mbledhje të afërt. Të fokusohemi tek përgjigja që duhet ti japim kësaj kalbësire që kundërmon në të gjithë botën, kësaj organizate kriminale që nuk ka kushtetutë, ligj e moral. Rama është i aftë të bëjë gjithcka që të qëndrojë në pushtet.

Tani është ora jonë. Nuk ka alternativë tjetër. Rama i kapur në flagrancë, përdor pushtetin për t’u mbrojtur. Ai është i aftë për grusht shteti. Ai i ka të gjitha pushtetet. Edhe këtë përpjekje që po bën drejtësia, t’ia asgjësojë. Nuk do ta kalojmë si rastet e tjera këtë tha, do bëjmë një analizë të thelluar. Ne do i themi “guxo” dhe do të japim përgjigjen e merituar, nëse përpiqesh të marrë pushtetin minimal të drejtësisë.

Nuk mundet të pranojmë një njeri i cili i ka bërë shqiptarëve vetëm të zeza. Tani kur kërkohet të japë hesape... Në rastin e Tunelit, Lubia është një shërbëtore, ka firmosur ato që i ka dhënë ai. Balluku duhej arrestuar, jo pezulluar”, tha Berisha.

18:15 - “Peleshi fsheh dokumentet e SPAK për Ballukun”, Berisha: Axhenda jonë është vetëm protesta

Foto: LSA

Sali Berisha deklaroi në Këshillin Kombëtar të PD, se kreu i Kuvendit, Niko Peleshi, me urdhër të Edi Ramës, po mban të mbyllura në sirtar dokumentet që SPAK ka dërguar për heqjen e imunitetit të zv.kryeministres Balluku.

Kreu i PD shprehet se me këto dokumente duhet të njihen të gjithë deputetët e Kuvendit, por Rama i frikësohet kësaj gjëje pasi del emri i tij.

“Prokuroria dërgoi kërkesën për heqjen e imunitetit dhe arrestimin e Lubisë. Prokuroria ka dërguar qindra dokumente, ligji dhe prokurori ua adreson kryetarit dhe cdo deputeti. Rama urdhëron Peleshin dhe ai mbyll në kasafortë dokumentet sekrete. Ato nuk mund të jenë sekrete për deputetët. Janë sekret se del Rama dhe porositë e tij. Janë filmime të tjera, fjalë të tjera. Tani kërkojnë t’i fshehin”, tha Berisha.

Lideri demokrat gjithashtu iu bëri thirrje qytetarëve që të bashkohen në protestën e opozitës, të parashikuar më 22 dhjetor.

“Situata është e rrëzikshme, por për të gjithë guximtarët që duan të kontribuojnë për veten dhe fëmijët e tyre, është përballja me këtë kalbësirë, të aftë të kryjë cdo krim për të mbijetuar. Të nderuar anëtarë të Këshillit, kjo është ora e thirrje për ne, për cdo atdhetar e shqiptar. Është tejkaluar cdolloj standardi. Ish-kordinatori për bandat, merr peng për t’i hapur rrugën kunatit të familjes. Këta ndaj pasuritë e njerëzve. Thirrja ime është të spostohemi në një orbitë të re. Kërkohet të operohet në një orbitë të re që është ajo e përballjes me këtë regjim. Është thirrje për guxim, kreativitet për të gjitha format e rezistencës dhe ju garantoj që fitorja është e jona, e opozitës, e shqiptarëve. Asgjë nuk do të na ndalë pa rikthyer kushtetutën, ligjin, të drejtat e shqiptarëve për votën e lirë dhe ndërshkuar këtë organizatë. Autokratët rrëzohen me protesta. Ne kemi bërë çdo gjë. Agjenda jonë është vetëm protestë, protestë, protestë”, deklaroi Berisha.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)