Dhuna në Kuvend, PS kërkon përjashtimin e 29 deputetëve të opozitës

Pas skenave kaotike dhe të dhunshme që u regjistruan këtë të enjte në Kuvend, Partia Socialiste depozitoi kërkesën për përjashtimin e një numri të madh deputetësh të Partisë Demokratike. Më specifikisht bëhet fjalë për kërkesë për masa disiplinore ndaj 29 deputetëve të opizitës.

Sipas kërkesës së PS-së, deputetët Belind Këlliçi, Albana Vokshi, Fidel Kreka, Ledina Alolli, Denisa Vata, Klevis Balliu dhe Flamur Noka duhet të përjashtohen për 60 ditë nga punimet e Kuvendit. Arsyeja është futja dhe përdorimi në Parlament i lëndëve piroteknike dhe tymse.

Ndërkohë për deputetët Sali Berisha, Gazment Bardhi, Elda Hoti, Besart Xhaferri, Xhelal Mziu, Bledjon Nallbati, Luçiano Boçi dhe Saimir Korreshi janë propozuar për 30 ditë përjashtim. Mes akuzave për ta janë dëmtimi i pajisjeve në sallën e Kuvendit, por edhe goditje e punonjësve të Gardës.

Për një periudhë 10-ditore përjashtimi janë propozuar deputetët Edi Paloka, Ina Zhupa, Klodiana Çapja, Oerd Bylykbashi, Enno Bozdo, Tomorr Alizoti, Ivi Kaso, Gent Strazimiri, Luan Baçi, Bledi Himçi, Greta Bardeli, Manjola Luku, Flamur Hoxha dhe Kliti Hoti.

“Seanca plenare e datës sotme u karakterizua nga akte të shumta dhune, përfshirë hedhjen e lëndëve piroteknike dhe sendeve të forta kundër Kryetarit të Kuvendit dhe anëtarëve të Këshillit të Ministrave. Këto akte kanë qenë të mirëorganizuara dhe të parapërgatitura”, deklaroi zëdhënësja e Grupit Parlamentar të PS-së, Erjona Ismaili.

Foto: Newsmax Albania

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)