Shehaj: Po mbyllet çështja Balluku, kërkesa e SPAK mbahet e fshehtë

Bllokim i transparencës lidhur me çështjen e zv.kryeministres Belinda Balluku, për të cilën SPAK ka kërkuar autorizim për arrestim. Kjo është akuza e ngritur nga kryetari i partisë “Mundësia”, Agron Shehaj. Deklaratat ai i bëri gjatë protestës së zhvilluar pranë Kryesisë së Kuvendit, në kohën kur po mblidhej Këshilli i Mandateve dhe Imunitetit.

Shehaj tha se, pavarësisht një kërkese zyrtare, nuk është lejuar të marrë pjesë në mbledhje, duke e cilësuar këtë vendim si një përpjekje për të mbajtur të fshehur kërkesën e SPAK. “Kanë vendosur që ta mbyllin çështjen dhe po bëjnë gjithçka për të fshehur atë që po ndodh. Kërkesa e SPAK po mbahet sekret. Si kryetar partie kam të drejtë të jem i pranishëm në Këshillin e Mandateve dhe të përfaqësoj forcën politike që drejtoj”, u shpreh ai.

Foto: LSA

Kreu i “Mundësia” hodhi akuza edhe ndaj Taulant Ballës, duke pretenduar se ai ka urdhëruar që në mbledhje të lejohen vetëm anëtarët e Këshillit. Sipas Shehajt, zhvillimi i mbledhjes me dyer të mbyllura përbën një precedent të rrezikshëm në Kuvend. “Është hera e parë që një mbledhje e tillë mbahet me dyer të mbyllura. Po përdoret si justifikim fakti se këtë e kanë kërkuar prokurorët, por në të vërtetë kjo shërben për të mbyllur çështjen”, tha ai.

Shehaj shtoi: “Kam kërkuar zyrtarisht të jem në Këshill dhe më është refuzuar. Kjo tregon se po tentohet të mbyllet çështja. Ndërkohë, SPAK kërkon arrestimin e Ballukut dhe ajo duhet të përballet me drejtësinë”. Për të vijuar me akuzat ndaj zv.kryeministres, kreu i Mundësia pretendon që Balluku ka deklaruar se përgjegjësia për tenderat bie mbi kryeministrin Edi Rama. “Sot nuk ka më kufi mes krimit dhe shtetit. Qytetari nuk e di më kujt t’i drejtohet për mbrojtje, kur institucionet që duhet ta mbrojnë janë të përfshira”, theksoi ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)