Vjen autorizimi i presidentit Begaj, kryeministri Rama do të nënshkruajë “Bordin e Paqes”

Kryeministri Edi Rama do të nënshkruajë marrëveshjen e “Bordit të Paqes”, të krijuar nga presidenti amerikan, Donald Trump. Shefi i Shtëpisë së Bardhë e ka ftuar zyrtarisht Shqipërinë që ti bashkohet nismës për paqen dhe rindërtimin e Gazës.

Në mënyrë formale, kryeministri Rama ka marrë edhe autorizimin e presidentit Bajram Begaj, për ta firmosur ai marrëveshjen. Aty theksohet se kompetencat, të drejtat dhe detyrimet që rrjedhin nga lëshimi i kësaj plotfuqie, si edhe përfaqësimi i Shqipërisë në “Bordin e Paqes”, nuk mund të delegohen te asnjë autoritet tjetër publik.

Dokumenti i publikuar, është dhënë bazuar në Kushtetutën e Republikës dhe në mbështetje të ligjit për marrëveshjet ndërkombëtare.

Foto ilustruese

AUTORIZIMI I PRESIDENTIT BAJRAM BEGAJ:

Autorizim për lëshimin e plotfuqisë për nënshkrim marrëveshjeje

Në mbështetje të nenit 92, shkronja “e”, të Kushtetutës së Republikës së Shqipërisë, nenit 5, pika 2, si dhe nenit 6, pika 1 dhe 3, të ligjit nr. 43/2016, “Për marrëveshjet ndërkombëtare në Republikën e Shqipërisë”, të ndryshuar, autorizoj Sh.T.Z. Edi Rama, Kryeministër i Republikës së Shqipërisë, për nënshkrimin e “Marrëveshjes së pranimit të Republikës së Shqipërisë në Kartën e Bordit të Paqes”, miratuar në parim me vendimin nr. 45, datë 21.1.2026, të Këshillit të Ministrave.

Kompetencat, të drejtat dhe detyrimet që rrjedhin nga lëshimi i kësaj plotfuqie, si dhe përfaqësimi i Republikës së Shqipërisë sipas këtij autorizimi, nuk mund të delegohen te asnjë autoritet apo organ tjetër publik. Ushtrimi i tyre nga autoriteti i përcaktuar në këtë autorizim është i detyrueshëm, në përputhje me ligjin.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)