Tirana, nga njëra protestë te tjetra, Lapaj në shesh: Rrugët miliona euro po shemben para syve tanë

Thirrje për bashkim qytetar dhe akuza të forta për korrupsion shoqëruan protestën e zhvilluar këtë të diel para Kryeministrisë, ku kreu i Lëvizjes “Shqipëria Bëhet”, Adriatik Lapaj, drejtoi kritika të drejtpërdrejta ndaj qeverisë për menaxhimin e fondeve publike dhe gjendjen e infrastrukturës në vend.

Në fjalën e tij para protestuesve, Lapaj u ndal te investimet në rrugë, duke deklaruar se “rrugët miliona euro po shemben para syve tanë”, ndërsa vuri në pikëpyetje punën e ish-ministres së Infrastrukturës, Belinda Balluku. “Rrugët e Ballukut janë shembur, cilat janë punët e saj fantastike?”, u shpreh ai.

Sipas Lapajt, situata e infrastrukturës është tregues i asaj që ai e cilësoi si keqmenaxhim dhe shpërdorim i parave publike. Ai theksoi se protestat nuk janë thjesht reagim politik, por kërkesë për llogaridhënie dhe drejtësi.

Foto: LSA

“Jemi këtu për drejtësinë. Bashkim, qëndresë pa ndalim”, deklaroi kreu i Lëvizjes “Shqipëria Bëhet”, duke u bërë thirrje qytetarëve të bashkëpunojnë “kundër atyre që na vjedhin”.

Lapaj nënvizoi se ndryshimi, sipas tij, vjen nga angazhimi individual dhe kolektiv. “Besoj te fuqia e individit, sepse individët kanë ndryshuar kombin”, tha ai, duke e vendosur theksin te mobilizimi qytetar si rrugë për të kërkuar një Shqipëri më të mirë.

Pasditen e së shtunës ishte Partia Demokratike, e cila protestoi në rrugët e Tiranës. Kjo protestë u shoqërua edhe me tensione dhe përplasje me forcat e rendit, por fatmirësisht pa të lënduar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)