Kafshoi një lodër dhe rrezikoi të mbytej, foshnja shpëtohet në telefon nga operatori i urgjencës

Një ndërhyrje e shpejtë dhe e jashtëzakonshme në distancë ka shmangur një tragjedi në Padovë të Italisë, ku një foshnjë rrezikoi të mbytej pasi kishte gëlltitur një copëz të një lodre. Ngjarja ndodhi kur nëna, në panik të madh, telefonoi shërbimin e urgjencës, duke raportuar se fëmija nuk po merrte më frymë.

Telefonatën e mori infermieri Gianluca Trevisan, nga qendra operative e shërbimit Suem 118 në Padovë. Ai e mbajti nënën në linjë dhe e udhëzoi hap pas hapi se si të kryente manovrat e hapjes së rrugëve të frymëmarrjes tek fëmijët, të cilat përdoren në raste mbytjeje.

Duke ndjekur udhëzimet e tij, nëna arriti të lirojë rrugët e frymëmarrjes së foshnjës, e cila filloi të marrë frymë sërish para se mjekët e urgjencës të mbërrinin në vendngjarje. Kur ambulanca mbërriti, foshnja ishte në gjendje të qëndrueshme dhe jashtë rrezikut për jetën.

Incidenti shkaktoi gjithashtu emocione të mëdha midis autoriteteve lokale. Presidenti i Rajonit të Venetos e quajti ndërhyrjen “një shembull të përsosmërisë në kujdesin shëndetësor të urgjencave”, duke vlerësuar rolin thelbësor si të nënës, ashtu edhe të punonjësit të kujdesit shëndetësor.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)