Të lidhur me terroristët, gjykata dënon 400 persona në Nigeri

Autoritetet në Nigeri kanë dënuar rreth 400 persona në procese gjyqësore masive, për lidhje me grupe militante islamiste që veprojnë në veri të vendit.

Në total, rreth 500 të dyshuar dolën para gjykatës federale në kryeqytetin Abuja, ku u akuzuan për pjesëmarrje në sulme të armatosura, financim apo mbështetje logjistike të grupeve ekstremiste. Nga këta, 386 persona u shpallën fajtorë dhe u dënuan me dënime që variojnë nga 5 vite burg deri në burgim të përjetshëm.

Sipas autoriteteve, disa nga të pandehurit kanë pranuar fajësinë për akuza të tilla si furnizimi me ushqime, bagëti dhe informacione për grupet militante.

Rastet lidhen kryesisht me organizatën Boko Haram dhe me një fraksion të saj, ISWAP, të cilat prej vitesh operojnë në verilindje të vendit dhe kanë shkaktuar dhjetëra mijëra viktima dhe mbi dy milionë të zhvendosur.

Qeveria nigeriane po përballet me presion në rritje për të përmirësuar sigurinë, pasi vendi është përfshirë nga dhuna e grupeve të armatosura, rrëmbimet për shpërblim dhe konfliktet separatiste në disa rajone.

Situata e pasigurisë ka tërhequr edhe vëmendjen ndërkombëtare. Shtetet e Bashkuara të Amerikës u kanë bërë thirrje qytetarëve të tyre që të rishqyrtojnë udhëtimet drejt Nigerisë për shkak të rrezikut të lartë të sigurisë.

Në një zhvillim të lidhur me krizën e sigurisë në rajon, SHBA ka kryer edhe sulme ajrore në veri të Nigerisë ndaj grupeve militante, duke thelluar më tej tensionet në zonat e prekura nga konflikti.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)