Përdoret thuajse nga të gjithë, kjo pajisje shtëpiake shkakton deri në 40,000 vdekje në vit

Sobat me gaz, ende të përhapura në familjet evropiane, mund të përbëjnë një kërcënim më serioz për shëndetin nga sa mendohej më parë. Sipas një raporti shkencor nga studiuesit në Universitetin Jaume I të Spanjës, ndotësit që ato lëshojnë gjatë gatimit lidhen me afërsisht 40,000 vdekje të parakohshme që ndodhin në vit në Evropë.

Ky përbën dyfishin e numrit të vdekjeve të shkaktuara nga aksidentet rrugore, sicc raporton The Guardian.

Sipas një studimi të publikuar në fund të vitit 2014, sobat me gaz lëshojnë gazra të dëmshëm të lidhur me sëmundjet e zemrës dhe të mushkërive, dhe vlerësohet se njerëzit që vdiqën para kohe për shkak të ekspozimit ndaj ndotjes, duke humbur mesatarisht pothuajse dy vite nga jeta e tyre.

Ekspertët theksojnë se publiku është shumë pak i informuar për rreziqet që paraqet ky zakon i përditshëm i kuzhinës. "Shkalla e problemit është shumë më e madhe nga sa mendonim", tha autorja kryesore e studimit, Juana María Delgado-Saborit, drejtuese e Laboratorit të Kërkimeve të Shëndetit Mjedisor në Universitetin Jaume I.

Studiuesit vlerësojnë se sobat me gaz janë të lidhura me 36,031 vdekje të parakohshme në vit në Bashkimin Evropian dhe 3,928 të tjera në Mbretërinë e Bashkuar. Autorët theksojnë se shifrat janë ndoshta konservative sepse ata shqyrtuan vetëm efektet e dioksidit të azotit (NO₂), pa përfshirë gazra të tjerë të dëmshëm si monoksidi i karbonit dhe benzeni.

NO₂ dihet se irriton traktin respirator dhe rrit rrezikun e sëmundjeve kronike të frymëmarrjes dhe kardiovaskulare. "Që në vitin 1978, e dinim se ndotja me NO₂ në kuzhinat me soba me gaz ishte shumë herë më e lartë se në ato me pajisje elektrike. Megjithatë, vetëm tani mund të vlerësojmë më saktë se sa jetë shkurton kjo", shtoi Juana Maria Delgado-Saborit.

Gazi vazhdon të përdoret gjerësisht në familjet evropiane. Një në tre familje në BE gatuan me gaz, ndërsa përqindja në Mbretërinë e Bashkuar është deri në 54%. Në disa vende, si Italia, Holanda, Rumania dhe Hungaria, më shumë se 60% e familjeve përdorin soba me gaz. Kur ato janë në përdorim, sobat djegin gaz fosil dhe lëshojnë grimca që irritojnë traktin respirator dhe përkeqësojnë gjendjen shëndetësore, thuhet në raport.

Studimi, i mbështetur nga Fondacioni Evropian i Klimës, bazohet në matjet e mëparshme të cilësisë së ajrit në familje. Shkencëtarët krahasuan nivelet e ndotjes së brendshme dhe të jashtme dhe vlerësuan rreziqet shëndetësore bazuar në të dhënat ekzistuese mbi ekspozimin ndaj NO₂.

Edhe pse disa ekspertë paralajmërojnë për pasiguri metodologjike, përfundimet janë në përputhje me një studim amerikan të vitit 2024, i cili vlerësoi se sobat me gaz dhe propan kontribuojnë në deri në 19,000 vdekje çdo vit në SHBA.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)