Tentoi t'i grabisë “shtëpinë e barit” bashkëatdhetarëve, 14 vite burg shqiptarit në Angli

Tenativa për të grabitur një “shtëpi bari” në Luton të Britanisë së Madhe, nuk ka shkuar siç duhet për një 39-vjeçar shqiptar, pasi ka përfunduar në prangat e policisë së Bedforshire.

Media lokale Luton Today raporton se Mario Canaj u arrestua gjatë përpjekjes për të hyrë me forcë në një fabrikë kanabisi, tenativë e cila shkaktoi një përplasje mes bandave rivale.

Mario Canaj me banim në St. James Court, në Coventry, u dënua me 14 vite burg të hënën e 1 dhjetorit nga Gjykata e Kurorës në Luton. Canaj u shpall fajtor për konspiracion për prodhim kanabisi, posedim arme zjarri me qëllim rrezikimin e jetës dhe pjesëmarrje në konflikt të dhunshëm.

Akuzat ndaj Canajt rëndojnë për ngjarjen e ndodhur në orët e para të 3 marsit 2021, ku oficerët u thirrën pas raporteve për të shtëna me armë dhe persona që po konfliktoheshin me armë të ftohta në zonën e Hallëicks Road.  

Tre burra u dënuan me burg në vitin 2023 në lidhje me të njëjtin incident, përfshirë 38-vjeçarin Gezim Brahimaj, nga Somersby Close, Luton.

Detektivja Jo Goodson, nga Njësia e Krimeve të Rënda e Bedfordshire tha se rasti i 39-vjeçarit shqiptar “demonstron vendosmërinë dhe qëndrueshmërinë e oficerëve” për të ndalur bandat.

“Kanë qenë gati pesë vite punë e pandalshme për të siguruar këto dënime, duke përfshirë hetime të hollësishme dhe bashkëpunim mes shumë ekipeve. Dhuna që shpërtheu atë natë ishte tronditëse, dhe ne kemi qenë plotësisht të përkushtuar për t’i sjellë para drejtësisë përgjegjësit. Këto dënime dërgojnë një mesazh të qartë se krimi i organizuar dhe përdorimi i armëve të zjarrit nuk do të tolerohen në Bedfordshire”, theksoi ajo.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)