“Iku koha kur bujqësia funksiononte me lëmosha”, Rama: Shqipëria do të konkurrojë me cilësi në BE

Kryeministri Edi Rama, gjatë një takimi me fermerë dhe sipërmarrës në qarkun e Elbasanit, prezantoi planin e qeverisë për mbështetjen e sektorit bujqësor, duke e cilësuar këtë katërvjeçar si një periudhë vendimtare për përgatitjen e fermerëve shqiptarë ndaj kërkesave të tregut europian. Ai theksoi se Shqipëria do të ketë Bankën e Zhvillimit, një institucion i ri që synon të ofrojë financim dhe projekte mbështetëse për bujqësinë dhe ndërmarrjet e vogla dhe të mesme.

“Shqipëria do të ketë Bankën e Zhvillimit, që do të mbështesë projektet tuaja. Agrokrediti është gjithashtu një instrument që vjen në favorin tuaj, ndërsa linja e re e kreditimit mund të arrijë deri në 250 milionë euro dhe deri në 2 milionë euro për secilën iniciativë”, tha Rama.

Ai bëri thirrje që bashkitë të jenë partnerë aktivë të fermerëve, duke i ofruar ndihmë financiare, teknike dhe institucionale, dhe të mos presin që mbështetja të vijë vetëm nga qeveria qendrore.

Kryeministri theksoi rëndësinë e cilësisë mbi sasinë, duke u bërë thirrje fermerëve që të krijojnë ndërmarrje të përbashkëta me pushtetin vendor dhe të investojnë në projekte që rrisin të ardhurat e tyre pa u varur nga lëmoshat elektorale. “Ikëm nga koha kur bujqësia funksiononte me lëmosha elektorale. Shqipëria nuk konkurron me sasi, por me cilësi. Vitet që vijnë janë për të krijuar hov të madh cilësor në bujqësi,” u shpreh Rama.

Ai gjithashtu theksoi rolin e shembujve të suksesshëm të fermerëve që kanë nisur bizneset e tyre me mund dhe pasion, duke nënvizuar se përkushtimi dhe dashuria për tokën janë faktorë kyç për suksesin. Rama shtoi se mbështetja do të jetë e drejtpërdrejtë dhe afatshkurtër, duke përmendur nevojën që ministri i Bujqësisë të jetë prezent në terren dhe jo vetëm në Tiranë, për të orientuar dhe ndihmuar fermerët në zbatimin e projekteve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)