Udinese turpëron Milanin në shtëpi, miqtë i japin leksion futbolli

Milan ka pësuar një humbje të rëndë në Serie A, duke u mposhtur 3-0 nga Udinese në stadiumin “San Siro”.

Skuadra e drejtuar nga Massimiliano Allegri hyri në ndeshje me synimin për t’u rikthyer te rezultatet pozitive pas rënies së formës në javët e fundit, por u përball me një kundërshtar shumë efikas në kundërsulm.

Pjesa e parë nisi me dominim territorial të Milanit, por pa raste të pastra. Rafael Leao provoi me një goditje nga distanca, por topi shkoi mbi kuadrat. Ndërkohë, Udinese kaloi në avantazh në minutën e 27-të, pas një aksioni të shpejtë ku Nicolo Zaniolo asistoi për Arthur Atta, goditja e të cilit u devijua dhe përfundoi në rrjetë, duke mposhtur portierin Mike Maignan.

Para pushimit, Milani kërkoi barazimin me Christian Pulisic, por tentativa e tij përfundoi pranë shtyllës. Megjithatë, goditja e dytë erdhi shpejt: Jurgen Ekkelenkamp shënoi me kokë pas një krosimi të Zaniolos, duke dyfishuar rezultatin.

Në pjesën e dytë, Milani u përpoq të rikthehej në lojë me raste nga Luka Modrić, Alexis Saelemaekers dhe Niclas Füllkrug, por portieri i Udineses, Maduka Okoye, bëri disa pritje vendimtare. Në fund, Udinese vulosi fitoren me golin e tretë të realizuar nga Atta.

Pas kësaj humbjeje, Milani ka pësuar 4 disfata në 7 ndeshjet e fundit në kampionat, duke e komplikuar ndjeshëm garën për titull. Synimi kryesor tani mbetet sigurimi i një vendi në Champions League, ndërsa Udinese ngjitet në mesin e tabelës pas një fitoreje të rëndësishme në transfertë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)