Misioni “pushtimi” i Hënës, “Artemis II” niset për të bërë historinë

Misioni “Artemis II” është nisur me sukses nga Qendra Hapësinore “Kennedy” në Florida, për realizimin e qëllimit të rëndësishëm drejt rikthimit të njeriut në Hënë. Raketa “Space Launch System” u ngrit në orën 6:36 pasdite, duke dërguar kapsulën Orion në një udhëtim rreth orbitës hënore.

Pak para nisjes, inxhinierët e NASA u përballën me dy probleme teknike, një në sistemin e sigurisë që lejon shkatërrimin e raketës në rast devijimi dhe një tjetër me një sensor të baterisë që sinjalizonte mbinxehje. Të dyja u zgjidhën në kohë, duke i hapur rrugë startit pa pengesa.

Edhe pse Artemis 2 nuk parashikon ulje në Hënë, ai është misioni i parë me astronautë për testimin e plotë të sistemeve të navigimit, komunikimit dhe mbështetjes së jetës, që do të mundësojnë misionet e ardhshme me ulje.

Në bord ndodhen 4 astronautë, komandanti Reid Wiseman, piloti Victor Glover, specialistja Christina Koch dhe Jeremy Hansen. Ky ekuipazh pritet të thyejë disa rekorde historike pasi Hansen do të jetë kanadezi i parë që orbiton Hënën, Glover afro-amerikani i parë, ndërsa Koch gruaja e parë që do të shohë anën e largët të saj.

Gjatë misionit 9-ditor, astronautët do të udhëtojnë më shumë se 400 mijë kilometra larg Tokës dhe rreth 7,600 kilometra nga Hëna, një distancë që nuk është arritur më parë nga njerëzit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)