5 mijë metra nën tokë, Anglia gjen alternativën për naftën

Rritja e çmimeve të naftës në tregjet ndërkombëtare, e ndikuar nga lufta në Lindjen e Mesme, po shtyn gjithnjë e më shumë vendet drejt kërkimit të alternativave të qëndrueshme energjetike. Në këtë kontekst, Mbretëria e Bashkuar ka bërë një hap të rëndësishëm duke zhvilluar një projekt inovativ që synon të zëvendësojë pjesërisht varësinë nga karburantet fosile.

Një kompani britanike, Geothermal Engineering Limited, ka realizuar shpime deri në 5 kilometra nën sipërfaqen e tokës në zonën e Kornuellit, në jugperëndim të Anglisë, për të shfrytëzuar energjinë gjeotermale. Projekti bazohet në nxjerrjen e ujit me temperatura shumë të larta, mbi 190 gradë Celsius, nga shkëmbinjtë e granitit të thellësisë. Ky ujë përdoret për të vënë në lëvizje turbinat dhe për të prodhuar energji elektrike pa emetime ndotëse.

Një nga avantazhet kryesore të kësaj teknologjie është se ajo nuk varet nga kushtet atmosferike, si era apo rrezatimi diellor, duke garantuar prodhim të vazhdueshëm energjie 24 orë në ditë. Aktualisht, impianti pranë qytetit Redruth është në gjendje të furnizojë me energji rreth 10 mijë banesa.

Përveç prodhimit të energjisë, projekti përfshin edhe nxjerrjen e litiumit, një mineral kyç për prodhimin e baterive të makinave elektrike. Pas përdorimit të nxehtësisë për energji, uji ftohet dhe përdoret për të rikuperuar këtë burim të rëndësishëm.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)