“Do ta kthejmë Iranin në epokën e gurit”, Trump: Kush do naftë nga Hormuzi ta marrë vetë

Presidenti i Shteteve të Bashkuara, Donald Trump deklaroi së fundmi se operacionet ushtarake kundër Iranit janë drejt përfundimit dhe se nevojiten edhe “dy deri në tre javë” për të arritur objektivat.

Në një fjalim drejtuar kombit, Trump u shpreh me tone të forta për suksesin e ofensivës amerikane, duke pretenduar se regjimi iranian dhe programi i tij bërthamor janë goditur rëndë.

“Në 32 ditë kemi shkatërruar regjimin dhe programin e tyre bërthamor. Nuk është parë kurrë diçka e tillë në historinë e luftës”, deklaroi ai.

Presidenti amerikan theksoi se SHBA nuk ka nevojë për naftën e Lindjes së Mesme dhe kritikoi aleatët për situatën në Ngushticën e Hormuzit.

“Ne nuk kemi nevojë për naftën nga Hormuzi. Vendet që varen prej saj le të shkojnë dhe ta marrin vetë”, u shpreh Trump, duke shtuar se ngushtica do të rihapet natyrshëm pas përfundimit të luftës.

Ai paralajmëroi gjithashtu për sulme të reja në rast se nuk arrihet marrëveshje me Teheranin.

“Nëse nuk ka marrëveshje, do të godasim impiantet e tyre energjetike dhe do ta kthejmë Iranin në epokën e gurit”, tha presidenti.

Trump mohoi se ndryshimi i regjimit ishte objektiv fillestar, por shtoi se kjo ka ndodhur si pasojë e eliminimit të liderëve kryesorë iranianë, duke lënë të kuptohet se një lidership i ri mund të jetë më i hapur ndaj dialogut.

Nga ana tjetër, ai u shfaq optimist për ekonominë amerikane, duke deklaruar se kriza nuk do të ketë pasoja afatgjata.

“Ekonomia jonë është më e fortë se kurrë. Pas luftës, gjithçka do të stabilizohet dhe çmimet e karburanteve do të bien”, u shpreh ai.

Megjithatë, tregjet reaguan menjëherë në drejtim të kundërt. Çmimi i naftës u rrit ndjeshëm, me Brent që kaloi mbi 105 dollarë për fuçi dhe WTI që arriti mbi 103 dollarë, duke reflektuar pasigurinë e vazhdueshme për zhvillimet në rajon.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)