“Të përdoren të gjitha mjetet e nevojshme”, OKB voton sot rezolutën për Hormuzin

Një rezolutë e rëndësishme për sigurinë në Ngushticën e Hormuzit pritet të votohet sot në Këshillin e Sigurimit të OKB-së, mes tensioneve të shtuara në Lindjen e Mesme.

Propozimi, i paraqitur nga Bahreini si president aktual i radhës, autorizon shtetet anëtare të përdorin “të gjitha mjetet mbrojtëse të nevojshme dhe proporcionale” për të garantuar kalimin e sigurt në këtë korridor strategjik për të paktën 6 muaj.

Fillimisht, rezoluta përfshinte elemente të Kapitullit 7 të Kartës së OKB-së, që do të lejonin përdorimin e forcës ushtarake, por këto u hoqën pas kundërshtimeve nga Kina dhe Rusia.

Megjithatë, formulimi aktual mbetet i ndjeshëm dhe ekziston mundësia që këto dy vende të përdorin veton, siç kanë bërë duke abstenuar në draftet e mëparshme.

Ndërkohë, situata në terren është përshkallëzuar më tej. Kompania shtetërore “Kuëait Petroleum Corporation” ka konfirmuar se rafineria Mina al-Ahmadi në Kuvajti është goditur nga dronë gjatë së premtes. Si pasojë e sulmit, janë raportuar zjarre në disa njësi operative, ndërsa ekipet e emergjencës po punojnë për të vënë situatën nën kontroll.

Këto zhvillime theksojnë rrezikun në rritje për infrastrukturën energjetike dhe rrugët detare jetike, duke shtuar presionin mbi komunitetin ndërkombëtar për të vepruar shpejt në stabilizimin e situatës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)