Mot i pazakontë në Itali, 3 metër borë bllokojnë turistët, zhduket makina në Molise

Mot i keq ka goditur rëndë Italinë qendrore dhe jugore, duke shkaktuar përmbytje, shembje rrugësh dhe izolim të zonave të tëra. Situata më kritike është regjistruar në rajonet e Abrucos dhe Molises, ku reshjet intensive të shiut dhe dëborës kanë krijuar emergjenca të shumta.

Në zonën malore të Passolancianos, në Abruzo, 13 persona mbetën të bllokuar në një hotel për shkak të rreth 3 metrave dëborë dhe rrugëve të pakalueshme. Ndërhyrja e ushtrisë, konkretisht e Regjimentit të Nëntë Alpin, bëri të mundur hapjen e rrugës dhe shpëtimin e tyre. Autoritetet po punojnë ende për pastrimin e plotë të akseve rrugore.

Një nga ngjarjet më të rënda ishte shembja e një ure mbi lumin Trigno, në kufirin mes Molises dhe Abrucos. Ura u rrëzua papritur ndërsa ishte e mbyllur për verifikime, duke shmangur kështu një tragjedi më të madhe. Megjithatë, dy automjete ndodheshin në zonë në momentin e shembjes, një arriti të largohej, ndërsa për tjetrën vijojnë kërkimet nga ekipet e shpëtimit, përfshirë zhytës dhe mjete ajrore.

Përmbytjet kanë detyruar evakuimin e rreth 150 personave vetëm në zonën e Termolit, ndërsa shumë familje janë strehuar në qendra emergjence. Rrugë të shumta janë bllokuar dhe lidhjet mes rajoneve janë ndërprerë, duke detyruar autoritetet të rekomandojnë lëvizje vetëm në raste të domosdoshme.

Ndërkohë, situata mbetet kritike edhe për transportin hekurudhor, me ndërprerje në linjën Adriatike dhe përdorimin e autobusëve si alternativë. Autoritetet lokale kanë paralajmëruar se dëmet janë të mëdha dhe pritet të kërkohet shpallja e gjendjes së emergjencës.

Operacionet e shpëtimit dhe monitorimit vijojnë pa ndërprerje, ndërsa Italia përballet me një tjetër provë të fortë nga moti ekstrem.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)