Gati në shtator, ish-kryeministri grek me parti të re

Ish-kryeministri grek, Alexis Tsipras, ka konfirmuar planet për të krijuar një lëvizje të re politike, e cila pritet të jetë gati në shtator, ose edhe më herët në rast se do të shpallen zgjedhje të parakohshme.

Në një intervistë për televizionin ANT1, Tsipras theksoi se iniciativa e tij synon të bashkojë tre drejtimet historike politike, të majtën radikale, socialdemokracinë dhe ekologjinë politike.

Ai shtoi se platforma e re do të ofrojë një vizion të qartë dhe propozime realiste, duke u bazuar mbi nevojat e shoqërisë, dhe se përvojat e kaluara politike e kanë bërë atë një lider më të matur dhe të përgatitur.

Tsipras nuk kurseu kritikat ndaj kryeministrit aktual konservator, Kyriakos Mitsotakis, duke vënë në dyshim aftësinë e qeverisë për të qeverisur pas një serie skandalesh dhe dorëheqjesh nga anëtarë të kabinetit dhe deputetë gjatë shtatë viteve të fundit.

Ish-lideri i Syriza-së theksoi se situata e tanishme mund të kërkojë zgjedhje të parakohshme për të rivendosur besimin e qytetarëve në institucionet shtetërore.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)