Inteligjenca amerikane: Irani nuk është gati për fundin e luftës, Trump merr në dorë planin e rrezikshëm

Situata mes Shteteve të Bashkuara dhe Iranit vijon të përshkallëzohet, ndërsa raportet e fundit nga inteligjenca amerikane tregojnë se Teherani nuk është i gatshëm të hyjë në negociata serioze për përfundimin e luftës.

Sipas burimeve të cituara nga mediat ndërkombëtare, Irani nuk i beson Uashingtonit dhe nuk e konsideron serioz në bisedime presidentin Donald Trump. Për më tepër, autoritetet iraniane mendojnë se ndodhen në një pozicion të fortë në konflikt dhe nuk shohin arsye për të pranuar kërkesat amerikane.

Ndërkohë, vetë Trump ka deklaruar se SHBA është në kontakt me kryetarin e parlamentit iranian, Mohammad Bagher Ghalibaf, duke e cilësuar atë si “të arsyeshëm”, por ka shtuar në mënyrë kërcënuese: “e dimë ku jeton”, një deklaratë që lidhet me sulmet ndaj figurave të larta të regjimit iranian.

Në terren, situata është përkeqësuar edhe më tej pas një sulmi ajror në Teheran, ku mbeti i plagosur rëndë ish-ministri i Jashtëm Kamal Kharazi, ndërsa bashkëshortja e tij humbi jetën. Sulmi i atribuohet operacioneve të përbashkëta të SHBA-së dhe Izraelit.

Paralelisht, në Shtëpinë e Bardhë po shqyrtohen skenarë të rinj ushtarakë. Sipas raportimeve, Pentagoni i ka paraqitur Trump një plan për të marrë nën kontroll rreth 500 kilogramë uranium të pasuruar të Iranit. Operacioni do të përfshinte ndërhyrje të drejtpërdrejtë në terren, përfshirë transportin ajror dhe ndërtimin e një piste për avionë cargo, një mision me rreziqe të larta.

Këto zhvillime tregojnë se përplasja mes palëve po hyn në një fazë edhe më të rrezikshme, me pak hapësirë për dialog dhe me rrezik real për përshkallëzim të mëtejshëm në rajon.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)