Fruti “trendy” që ka shumë përfitime, por edhe disa të meta

Në vitet e fundit është kthyer në një nga ushqimet më të preferuara vitet e fundit, i konsideruar shpesh si një “superfood” për shkak të vlerave të larta ushqyese. Avokado është i pasur me yndyra të shëndetshme, ka veti anti-inflamatore, shije të këndshme dhe përdoret lehtësisht në shumë receta, nga sallatat deri te guacamole.

Megjithatë, ekspertët theksojnë se avokado duhet konsumuar me masë, pasi është një frut me përmbajtje të lartë kalorike. Po ashtu, për shkak të nivelit të lartë të kaliumit, ai mund të mos jetë i përshtatshëm për personat që vuajnë nga probleme me veshkat.

Një tjetër kritikë lidhet edhe me ndikimin mjedisor të kultivimit të tij, që konsiderohet relativisht i lartë. Në përfundim, avokado mbetet një ushqim i shëndetshëm, por rekomandohet të përfshihet në dietë në sasi të moderuara, brenda një regjimi ushqimor të balancuar.

A është frut apo perime?

Nga pikëpamja botanike, avokado është frut, pasi është një lloj kokrre që vjen nga bima Persea americana, e familjes Lauraceae, ku bëjnë pjesë edhe dafina dhe kanella. Ai ka një farë të vetme të madhe në qendër. Në kuzhinë, për shkak të shijes neutrale dhe përmbajtjes së ulët të sheqerit, avokado shpesh trajtohet si perime dhe përdoret kryesisht në gatime të kripura.

Foto ilustruese

Shumë yndyra të mira dhe shumë kalori

Avokado është veçanërisht i pasur me yndyra mono-të-pangopura, të njohura si “yndyrna të mira”. Për 100 gram tul, avokado përmban rreth 20 gram yndyrë, rreth 8 gram karbohidrate, rreth 1.8 gram proteina dhe afro 220 kalori. Kjo e bën atë shumë të ngopshëm dhe të dobishëm për kontrollin e oreksit dhe të nivelit të sheqerit në gjak.

Përfitimet kryesore për shëndetin

Sipas specialistëve, konsumimi i avokados lidhet me disa efekte pozitive. Ai ndihmon në kontrollin e tensionit të lartë të gjakut falë përmbajtjes së lartë të kaliumit, por përmban edhe minerale të rëndësishme si magnez, zink, mangan dhe fosfor. Gjithashtu ka folate që ndihmojnë në proceset e rritjes dhe riparimit të qelizave, si edhe ndihmon në uljen e kolesterolit të keq (LDL) dhe rritjen e atij të mirë (HDL), duke mbështetur shëndetin e zemrës. Avokado mbetet një zgjedhje e mirë për një dietë të shëndetshme, por gjithmonë me kujdes në sasinë e konsumuar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)