Çmimi i naftës “zgjon” PD-në, Berisha u shpall luftë oligopoleve në ekonominë shqiptare

Kreu i Partisë Demokratike Sali Berisha rgjatë mbledhjes së sotme të grupit parlamentar e ka vendosur fokusin tek rritja e çmimeve e ndikuar nga lufta në Lindjen e Mesme, veçanërisht ajo e karburanteve, duke e cilësuar situatën si një barrë të papërballueshme për qytetarët.

Në fjalën e tij, Berisha u ndal në mënyrë të veçantë te çmimi i naftës dhe niveli i taksimit në vend, duke e krahasuar atë me tregjet ndërkombëtare, si për të treguar se qeveria ‘Rama’ s’ka marrë asnjë masë për të zbutur kostot.

“Kur një litër në SHBA shitet me 1 dollarë, këtu taksa është 1.1 dollarë, kjo tejkalon çdo lloj logjike ekonomike dhe është një bazë për çmimet e larta. Shqipëria ka ligje, dhe ligje të mira, të cilat, të zbatuara, mbrojnë qytetarët nga oligopoli. Ndaj dhe një nga drejtimet e punës tonë do të jetë mbrojtja e qytetarëve nga oligopolet. Partia Demokratike ka një model për taksë të ulët 10 përqind dhe do të studiojë çdo rast abuzimi, duke identifikuar institucionet e korruptuara që favorizojnë oligopolet”, u shpreh ai.

Berisha deklaroi se politika fiskale është një ndër arsyet kryesore të çmimeve të larta në vend. Sipas tij, situata nuk lidhet vetëm me naftën, por edhe me produkte të tjera bazë, megjithatë karburanti mbetet faktor kyç në zinxhirin e rritjes së çmimeve.

“Oligopolet janë një problem madhor. Janë më të këqij për qytetarët, sepse rrisin çmimet në mënyrë të pajustifikuar dhe rëndojnë jetesën e përditshme të tyre”, tha Berisha.

Në përfundim, lideri i opozitës deklaroi se mbrojtja e qytetarëve nga çmimet e larta dhe abuzimet në treg do të jetë një nga prioritetet kryesore të Partisë Demokratike.

“Janë ligje shumë të mira. Në qoftë se zbatohen, nuk mundet që çmimet të shkojnë më lart se vendet me fuqi blerëse 5 herë më të madhe se ne. Është në detyrimin madhor të Partisë Demokratike të ndërmarrë një luftë frontale në mbrojtjen më të vendosur të interesave të qytetarëve”, shpjegoi kreu i PD.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)