GJKKO lë në burg 4 të dyshuarit për rrëmbimin dhe vrasjen e Renis Dobrës

Gjykata e Posaçme Kundër Korrupsionit dhe Krimit të Organizuar ka vendosur të lërë në fuqi masën e sigurisë “arrest në burg” për katër të dyshuarit për rrëmbimin dhe vrasjen e 23-vjeçarit Renis Dobra, një ngjarje që tronditi opinionin publik në verën e vitit 2025.

Vendimi i GJKKO-së konfirmon qëndrimin në qeli për Petrit Çakrajn dhe vëllezërit Aleksandër, Kristi dhe Fatjon Bushgjokaj, pasi gjykata vlerësoi se nuk ekziston asnjë shkak ligjor për ndryshimin e masës së sigurisë.

Sipas dosjes hetimore, ngjarja ka ndodhur më 8 korrik 2025, kur i riu nga fshati Zenisht i Matit u zhduk teksa po kthehej në banesë me automjetin e familjes. Fillimisht, familjarët ngritën alarmin në polici pasi ai nuk u kthye në shtëpi, ndërsa dyshimet u shtuan pas një telefonate që sinjalizonte praninë e automjetit të tij të ndaluar në rrugë, përballë një fuoristrade me drita të forta.

Pas kërkimeve, trupi i pajetë i 23-vjeçarit u gjet në bregun e liqenit të Shkopetit, ndërsa automjeti kishte përfunduar në ujë. Ekspertiza mjeko-ligjore përcaktoi se shkaku i vdekjes ishte asfiksia, si pasojë e shtrëngimit me litar në pjesën e fytit.

Zbulimi i kësaj ngjarjeje çoi në intensifikimin e hetimeve nga policia e Matit dhe strukturat e tjera ligjzbatuese, duke çuar në arrestimin e katër të dyshuarve që tashmë do të vijojnë të qëndrojnë në burg me vendim të konfirmuar nga gjykata.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)