Pranverë e acartë në Korçë, prilli nis me dëborë

Edhe pse kalendari shënon 1 prill dhe jemi në mesin e pranverës, qarku i Korçës është përfshirë nga reshje dëbore gjatë orëve të fundit, kryesisht në zonat malore.

Situata është më e theksuar në aksin Boboshticë–Dardhë, ku trashësia e dëborës arrin nga 20 deri në 25 centimetra.

Autoritetet bëjnë me dije se kontraktorët ndodhen në terren dhe po punojnë për pastrimin e rrugëve, si dhe për kriposjen e tyre, me qëllim garantimin e qarkullimit të sigurt.

Ndërkohë, vendi ynë gjatë ditës së sotme do të ndikohet nga kushte atmosferike të paqëndrueshme. Moti parashikohet me vranësira mesatare deri të dendura, ndërsa reshjet e shiut kanë nisur që në orët e para të ditës, me intensitet të ulët në pjesën më të madhe të territorit.

Gjatë vijimit të ditës, reshjet e shiut pritet të jenë të herëpashershme dhe kryesisht me intensitet të ulët, ndërsa në zona të veçanta mund të shoqërohen edhe me shtrëngata afatshkurtra.

Në zonat alpine dhe në verilindje-lindje, në lartësitë mbi 700–900 metra, si dhe në juglindje mbi 1000 metra, parashikohen reshje dëbore me intensitet të ulët, të cilat lokalisht mund të arrijnë deri në intensitet mesatar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)