Kriza e transportit publik, nga java e ardhshme paralajmërohet ndërprerje e shërbimit për 450 linja

Shoqatat e Transportit Publik në vend kanë ngritur alarmin për një situatë të rënduar financiare në këtë sektor. Ato kanë paralajmëruar se nga java e ardhshme rrezikohet ndërprerja e shërbimit për rreth 450 linja urbane dhe interurbane në të gjithë Shqipërinë.

Sipas tyre, rritja e kostove operative, sidomos për shkak të shtrenjtimit të karburantit, po e bën të pamundur vijimin normal të aktivitetit. Përfaqësuesit e Shoqatës së Transportit Qytetas dhe Shoqatës së Transportit Urban dhe Interurban i janë drejtuar sërish institucioneve përgjegjëse, duke kërkuar ndërhyrje urgjente dhe masa kompensuese për karburantin.

“Kemi kërkuar një skemë kompensimi për karburantin, të ngjashme me atë të vitit 2022”, bëjnë me dije operatorët, duke theksuar se mungesa e mbështetjes po e rëndon më tej situatën financiare të kompanive. Sipas tyre, gjatë takimit të mbajtur më 1 prill ishte premtuar një tjetër mbledhje më 7 prill, e cila nuk është realizuar.

Foto ilustruese

“Deri më tani nuk ka asnjë reagim apo qëndrim zyrtar nga institucionet”, shprehen përfaqësuesit e sektorit. Ata shtuan se kjo mungesë komunikimi po rrit pasigurinë në treg dhe po rrezikon vijimin e shërbimit publik të transportit. Shoqatat i janë drejtuar Ministrisë së Financave dhe Ekonomisë, Ministrisë përgjegjëse për transportin, si dhe Bashkisë së Tiranës, duke kërkuar zgjidhje të menjëhershme për të shmangur paralizimin e linjave të transportit publik.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)