Roberto Baggio dhe dosja e harruar: Si përfunduan në plehra 900 faqet që do të shpëtonin futbollin italian

Emri i Roberto Baggio lidhet përjetësisht me kujtimet e Italisë në Botërorin 1994, mes heroizmit dhe dramës së finales kundër Brazilit. Por vite më vonë, “Bishtaleci i Artë” mori përsipër një tjetër përgjegjësi: të provojë të rikthejë futbollin italian në nivelet më të larta. Këtë do ta realizonte me një projekt konkret dhe të detajuar.

Në vitin 2011, pas eliminimit të Italisë nga Kupa e Botës 2010, Baggio prezantoi një dosje prej rreth 900 faqesh. Ajo titullohej “Rinovimi i së ardhmes” dhe ishte përgatitur nga një grup prej 50 ekspertësh. Qëllimi ishte i qartë: rindërtimi i sistemit të futbollit italian nga themelet. Megjithatë, sipas vetë Baggios projekti nuk u mor kurrë seriozisht në shqyrtim nga autoritetet e futbollit në Gadishullin Apenin.

Në qendër të planit ishte nevoja për struktura moderne sportive, duke përfshirë krijimin e rreth njëqind qendrave rajonale në të gjithë vendin, që do të ishin në varësi të federatës. Projekti parashikonte gjithashtu ndërtimin e një sistemi të avancuar të mbledhjes së të dhënave dhe monitorimit të talenteve në nivel lokal, si edhe formimin e trajnerëve të kualifikuar me arsim universitar, me përvojë profesionale dhe aftësi edukative.

Një tjetër element kyç ishte krijimi i një grupi të përhershëm studimi, me profesorë dhe studentë të universitetit, të cilët do të ishin në kontakt të vazhdueshëm me trajnerët në terren. Baggio kishte kuptuar më herët problemet në zhvillimin e futbollistëve të rinj, duke kritikuar fokusin e tepruar te taktika në dëm të teknikës individuale. Ai propozonte një qasje të bazuar në kontakt të vazhdueshëm me topin dhe në teste të kombinuara fizike dhe teknike, duke theksuar se vlerësimet vetëm fizike nuk pasqyrojnë realitetin e lojës.

Një aspekt inovativ për kohën ishte edhe ideja e digjitalizimit të plotë të sistemit të zbulimit dhe zhvillimit të talenteve. Ky është një koncept që sot konsiderohet thelbësor në futbollin modern. Megjithatë, në atë kohë idetë e tij nuk gjetën mbështetje.

Projekti i Baggio-s mbeti për një kohë të gjatë në sirtar dhe më pas përfundoi në koshin e plehrave. Ndërkohë, futbolli italian vazhdoi të përballet me vështirësi, duke kulmuar me eliminime të njëpasnjëshme zhgënjyese në kompeticionet ndërkombëtare. Sot, shumë prej ideve të tij duken më aktuale se kurrë, duke ngritur pyetjen nëse një mundësi e madhe për ndryshim u humb që në fillim.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)