“I zhytur në naftë”, Berisha: Hetim për Autoritetin e Konkurrencës, amendamente për çmimin e karburanteve

Kritika të ashpra për rritjen e çmimeve të karburanteve, duke theksuar se kjo situatë rëndon shumë mbi xhepat e familjeve shqiptare. Kreu i Partisë Demokratike, Sali Berisha akuzoi Autoritetin e Konkurrencës, të cilin e akuzon se është “i zhytur në naftë” dhe do të kërkojë nisjen e një hetimi. Ai njoftoi se opozita do të dorëzojë në Kuvend amendamente dhe ligje për të reduktuar ndikimin e rritjes së çmimeve.

“Konflikti në Lindjen e Mesme solli krizën njësoj si COVID. Por, Lindja e Mesme është rajon me ndikim madhor në energjinë e botës. Ndërhyrja është një emergjencë. Edhe akcizën e ka të lidhur me inflacionin. Nafta qëndron si ndëshkim për pensionistët, por edhe për shqiptarët në përgjithësi. Ne në parlament do dorëzojmë amendamente e ligje dhe do kërkojmë hetim për Autoritetin e Konkurrencës që është i zhytur në naftë”, tha Berisha.

Ai shtoi se situata ekonomike në vend është e rënduar. “Pasojat janë shumë të rënda. Për herë të parë, ekonomia shqiptare është minorancë në kontributin e rritjes ekonomike. Bujqësia dhe industria janë në recesion. Ndërsa Edi Rama mendon se këto do i kapërcejë me mashtrime… Nafta qëndron si ndëshkim me taksat e saj mbi pensionistët dhe mbi qytetarët në tërësi”, shtoi ai.

Berisha u shpreh se PD do të veprojë për përgjysmimin e ngarkesës fiskale mbi karburantet, duke synuar çmime më të ulëta për qytetarët krahasuar me vendet fqinje. “Ne duhet të zbresim te ngarkesa fiskale, të cilat garantojnë çmime më të ulëta se në vendet përreth, ku transporti nuk kushton aq sa nga Durrësi në Prishtinë apo Tetovë”, deklaroi kreu i demokratëve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)