Zvicra kërkon punëtorë, paga deri në 6.500 euro

Zvicra vijon të mbetet një nga destinacionet më tërheqëse për punësim në Europë, duke ofruar mijëra vende të lira pune dhe paga që arrijnë deri në 6.500 euro në muaj, madje edhe më shumë në sektorë të specializuar. Sipas të dhënave të fundit nga rrjeti europian i punësimit EURES, në këtë vend janë aktualisht rreth 20 mijë oferta aktive, duke reflektuar një kërkesë të lartë për fuqi punëtore të kualifikuar.

Mundësitë për punësim shtrihen në disa sektorë kyç, ku spikasin veçanërisht shëndetësia, industria, ndërtimi dhe teknologjia. Kjo kërkesë lidhet si me plakjen e popullsisë, ashtu edhe me zhvillimin e qëndrueshëm ekonomik të vendit, që kërkon profesionistë me arsimim dhe eksperiencë specifike.

Sektori shëndetësor mbetet ndër më të kërkuarit, me nevojë për mjekë specialistë në fusha si pediatria, gjinekologjia, anesteziologjia dhe mjekësia e brendshme. Gjithashtu kërkohen infermierë, teknikë operacioni dhe ndihmës shëndetësorë. Paralelisht, edhe sektori teknik dhe industrial paraqet kërkesë të lartë, ku profesione si marangozë, operatorë makinerish, punëtorë metalurgjie, si dhe teknikë radiologjie e farmacie janë ndër më të kërkuarat. Këto vende pune përqendrohen kryesisht në rajone si Zyrihu, pjesa qendrore dhe veriperëndimi i vendit.

Një nga arsyet kryesore që e bën Zvicrën tërheqëse është niveli i lartë i pagave. Mesatarja mujore bruto arrin rreth 6.788 franga zvicerane, afërsisht 7.400 euro, ndërsa në sektorë si teknologjia e informacionit mund të kalojë 9.000 franga, dhe në financa apo sigurime afrohet me 10.000 franga.

Megjithatë, shumica e vendeve të punës kërkojnë kualifikim të lartë, eksperiencë dhe njohuri të gjuhës, sidomos gjermanishtes. Edhe pse qytetarët europianë kanë më shumë lehtësi për të aplikuar, është e domosdoshme pajisja me leje pune dhe qëndrimi, si dhe përmbushja e kritereve të çdo pozicioni.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)