Nëna dhe vajza mbushën valixhet me kokainë, arrestohen në aeroport

Një rast trafiku droge është zbuluar në Spanjë, ku një nënë dhe vajza e saj, përkatësisht 47 dhe 19 vjeç, janë arrestuar në aeroportin e Valencias teksa tentonin të udhëtonin drejt Britanisë së Madhe me një sasi të madhe kokaine në bagazhe.

Sipas mediave lokale, dy britaniket kishin hyrë në Spanjë si turiste, duke pretenduar se po kalonin pushimet e Pashkëve në qytetin bregdetar të Valencias. Ato u ndaluan vetëm pak ditë pas mbërritjes së tyre dhe përpara nisjes së fluturimit drejt Birminghamit.

Gjatë kontrollit, autoritetet zbuluan rreth 42 kilogramë kokainë të fshehura në dy valixhe. Lënda narkotike ishte paketuar në 23 pako dhe në formë tabletash, çka ngriti menjëherë dyshimet për trafik të organizuar ndërkombëtar.

Pas arrestimit, nënë e bijë dolën përpara një gjykate në Quart de Poblet, pranë aeroportit të Manises, ku u vendos masa e paraburgimit.

Ky nuk është rasti i parë i tillë në të njëjtin aeroport. Në fund të majit, autoritetet spanjolle arrestuan një tjetër çift britanik, pasi në valixhet e tyre u gjetën mbi 33 kilogramë marijuanë. Sipas policisë, ata u identifikuan për shkak të sjelljes së dyshimtë dhe nervoze gjatë kontrollit. Në janar të vitit të kaluar, një modele britanike e platformës OnlyFans u arrestua në Barcelonë me mbi 34 kilogramë kanabis, ndërsa një tjetër shtetas britanik u dënua me burg për tentativë trafiku droge.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)