Krijohet lentja e kontaktit “smart”, monitoron dhe kuron sëmundjet e syrit

Një lente kontakti inteligjente, e rehatshme dhe me kosto të ulët, mund të shënojë një hap të rëndësishëm në trajtimin e sëmundjeve të syrit, veçanërisht të glaukomës.

Pajisja inovative është zhvilluar nga një bashkëpunim ndërkombëtar i udhëhequr nga Universiteti i Shkencës dhe Teknologjisë i Hong Kongut dhe “Terasaki Institute for Biomedical Innovation”, dhe është prezantuar në revistën shkencore “Science Translational Medicine”.

Kjo lente dallon nga modelet e mëparshme pasi nuk ka nevojë për bateri dhe nuk përmban komponentë elektronikë të mëdhenj. Ajo është e ndërtuar nga materiale polimerike dhe është projektuar për të qenë e lehtë dhe e rehatshme për përdorim të përditshëm.

Funksioni kryesor i saj është monitorimi në kohë reale i presionit intraokular, një tregues kyç për pacientët me glaukomë. Kur sensori zbulon rritje të këtij presioni, lente lëshon automatikisht doza të kontrolluara të medikamenteve si timololi ose brimonidina, të cilat përdoren zakonisht në trajtimin e kësaj sëmundjeje.

Teknologjia përfshin një sensor mikrofluidik dhe një strukturë biomimetike që rrit ndjeshmërinë e pajisjes, duke mundësuar reagim të shpejtë dhe të saktë ndaj ndryshimeve në sy.

Lentja është testuar me sukses tek lepujt dhe në modele laboratorike, duke treguar rezultate premtuese. Studiuesit besojnë se kjo shpikje hap rrugën për një brez të ri trajtimesh të personalizuara, që kombinojnë diagnostikimin dhe terapinë në një pajisje të vetme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)